Urdu Sad Poetry: Ghazal's

Showing posts with label Ghazal's. Show all posts

Thursday, February 6, 2014

Hijr Ki Pehli Shaam Ke Saaye...

Khawaja Islam February 06, 2014 0

Qateel Shifai

Hijr Ki Pehli Shaam Ke Saaye Door Ufaq Tak Chhaaye Thay

Ham Jab Os Ke Seher Se Niklay Sab Raastay Saath Laye Thay

Jaanay Wo Kia Soch Raha Tha Apne Dil Mein Saari Raat

Pyaar Ki Baatain Kartay Kartay Os Ke Nain Bhar Aaye Thay

Mere Andar Chali Thi Aandhi Theek Osi Din Pat Jharr Ki

Jis Din Apne Jorray Mein Os Ne Kuch Phool Sajaaye Thay

Os Ne Kitnay Pyaar Se Apna Kufar Dia Nazraanay Mein

Ham Apne Emaan Ka Sodaa Jis Se Karnay Aaye Thay

Kaisay Jati Mere Badan Se Beetay Lamhon Ki Khushbuu

Khwaabon Ki Is Basti Mein Kuch Phool Mere Hamsaaye Thay

Kaisa Pyaara Manzar Tha Jab Dekh Ke Apne Saathi Ko

Pairr Pe Bethi Ek Chirrya Ne Apne Per Phailaaye Thay

Rukhsat Ke Din Bheegi Aankhon Os Ka Wo Kehna Haye “Qateel”

Tum Ko Lout Hee Jana Tha Tou Is Nagri Mein Kiun Aaye Thay.!

Yeh mojza bhi muhabbat kabhi dikhaye mujhe..

Khawaja Islam February 06, 2014 0

Qateel Shifai

Yeh mojza bhi muhabbat kabhi dikhaye mujhe..

Kay sang tujh pe girain aur zakham aye mujhe..

Main ghar se teri tamanna jub pehan k niklun..

Barhana shehr main koe nazar na aye mujhe..

Wo mera dost hai saray jahan ko hai maloom..

Dagha karay wo kisi se to sharm aye mujhe..

Wo mehrbaan hai to iqraar kyu nahi kerta..

Wo bdguman hai to so bar azmaye mujhe..

Main apni zaat main neelam horaha hun QATEEL,

Gham-e-hayaat se keh do k kharid laye mujhe..

Insha G utho ab kooch karo...

Khawaja Islam February 06, 2014 0

Ibn-e-Insha

Insha G utho ab kooch karo..

Iss shehr me g ka lagana kya

Wehshi ko sukoon se kya matlab

Jogi ka nagar me thikana kya

Iss dil k darida daman me

Dekho to sahi socho to sahi

Jis jholi me sou chhaid huay

Uss jholi ka phailaana kya

Shab beeti,chaand bhi doob chala

Zanjeer parri darwazy par

Kyun dair gaey ghar aaey ho

Sajni se karo gay bahaana kya

INSHA G utho ab kooch karo

Iss shehr me G ka lagaana kya…

Dil hijr k dard se bojhal hai...

Khawaja Islam February 06, 2014 0

Ibn-e-Insha

Dil hijr k dard se bojhal hai, ab Aan milo to behter hai,

Is baat se hum ko kya matlab, yeh kaise ho yeh kyun kar ho?

Ik bheek k donon kaasay hain, ek pyaas k donon pyaase hai,

Hum khaiti hain, tum baadal ho, hum nadiya hain tum saagar ho!

Yeh dil hai k jalte seene mein, ik dard ka phora alhar sa,

Na gupt rahe na phoot bahe, koi marham ho koi nishtar hai,

Hum saanjh samay ki chhaya hain, tum charhti raat k chandar maan

Hum jaate hain, tum aate ho, phir mail ki soorat kyun kar ho!

Ab husn ka rutba aali hai, ab husn se sehra khaali hai,

Chal basti mein banjaara ban, chal nagri mein saudagar ho,

Jis cheez ki tujh ko nisbat hai, jis cheez ki tujh ko chahat hai,

Woh sona hai woh heera hai, woh maati ho ya kankar ho,

Ab Insha ji ko bulana kya, ab pyar k deep jalana kya

Jab dhoop aur chhaya ek se hon, jab din aur raat barabar ho,

Woh raaten chaand k saath gayin, woh baatein chaand k saath gayin,

Ab sukh k sapne kya dekhein, jab dukh ka sooraj sar par ho…

(Judai:Separation)(Mail:Meet)(Phora:Pimple)(Rutba:Stage,Level)

Dil dard ki shiddat se..

Khawaja Islam February 06, 2014 0

Ibn-e-Insha

Dil dard ki shiddat se khoon-gashta-o-see paara,

Is sheher mein phirta hai ek wehshee-o-awara,
Shayar hai ke aashiq hai, jogi hai ke banjara,
Darwaza khula rakhna,

Seene se ghata uthe, aankhon se jhari barse,

Phaagan ke nahi badal, jo chaar ghadi barse,
Barkha hai ye bhaado ki, barse to badi barse,
Darwaza khula rakhna,

Aankhon mein ek alam, aankhon mein to duniya hai,

Honthon pe magar mohrein, munh se nahi kehta hai,
Kis chiz ko kho baitha hai, kya dhundne nikla hai,
Darwaza khula rakhna,

Haan thaam mohabbat ki gar thaam sake dori,

Sajan hai, tera sajana, ab tujhse to kya chori,
Yeh jis ki manaadi hai basti mein teri gori,
Darwaza khula rakhna,

Shikwon ko utha rakhna, aankhon ko bichha rakhna,

Ek shama dareeche ke chaukhat pe jala rakhna,
Mayoos na phir jaaye, haan paas-e-wafa rakhna,
Darwaza khula rakhna darwaza khula rakhna.

Dekh lete ho mohabbat se yehi kaafi hai...

Khawaja Islam February 06, 2014 0

Ghazal's

Dekh lete ho mohabbat se yehi kaafi hai,

Dil dharakta hai sahulat se, yehi kaafi hai,

Haal dunya ke sataye huye kuch logon ka,

Puch lete ho shararat se, yehi kaafi hai,

Jo bhi raste mein guzarta hai mere pehlu se,

Dekhta hai teri nisbat se, yehi kaafi hai,

Muddat’ton se nahin dekha tera jalwa lekin,

Yaad ajate ho shidat se, yehi kaafi hai,

Saari dunya se ulajhte hain lekin tera kahaa,

Maan jate hain sharafat se, yehi kaafi hai,

Kya hua hum jo muyassar jo zar-o-maal nahin,

Katt rahi hai bari izat se, yehi kaafi hai,

Aaj ke ehd taghaful mein kisi dar pe Munir,

Koi ajaye zarurat se, yehi kaafi hai..!

Yeh aur baat teri gali main na ayen hum...

Khawaja Islam February 06, 2014 0

Habib Jalib

Yeh aur baat teri gali main na ayen hum,

Lekin yeh kya ke tera sheher chorr jayen hum,

Muddat huyi hai kuye bataan ki taraf gaye,

Awaargi se dil ko kahan tak bachaayen hum,

Be’noor ho chuki hai bohat sheher ki fizaa,

Tareek raston par kahin kho na jayen hum,

Us ke baghair aaj bohat jee udaas hai,

Jaalib chalo kahin se usey dhoond ke layen hum.!

Kahin aah ban ke lab per tera naam aa na jaye...

Khawaja Islam February 06, 2014 0

Habib Jalib

Kahin aah ban ke lab per tera naam aa na jaye,

Tujhe bewafa kahoon mein, woh maqaam aa na jaye,

Jisey sun ke toot jaye mera aarzu bhara dil,

Teri anjuman se mujh ko woh peyaam aa na jaye,

Woh jo manzilon per laa kar kisi hamsafar ko lootain,

Unhi rehzanon mein tera kahin naam aa na jaye,

Isi fikr mein hain ghalat yeh nizaam ke bandey,

Jo tamaam zindagi hai woh nizaam aa na jaye..!

Ajnabi khauf fizaon main basa ho jaise...

Khawaja Islam February 06, 2014 0

Ghazal's

Ajnabi khauf fizaon main basa ho jaise

Shahar ka shahar hi aseb zada ho jaise

Rat ke pichle pahar ati hain avazain si

Door shahara main koi chiKh raha ho jaise

Dar-o-divar pe chai hai udasi aisi

Aaj har ghar se janaza sa utha ho jaise

Muskurata hun pa-e-Khatir-e-ahabab magar

Dukh to chehre ki lakiron pe saja ho jaise

Ab agar dub gaya bhi to marunga na Kamal

Beh-tey pani pe mera nam likha ho jaise.!

Hai aap ke honton pe jo muskaan wagera...

Khawaja Islam February 06, 2014 0

Ghazal's

Hai aap ke honton pe jo muskaan wagera,

Qurbaan gaye is pe dil-o-jaan wagera,

Billi to yunhi muft main badnaam huyi,

Thailay mein to kuch aur tha samaan wagera,

Be’hirss o gharzz farzz adaa ki jiye apna,

Jis tarah police karti hai chalaan wagera,

Ab hosh nahin koi ke badaam kahan hai,

Ab apni hatheli pe hain dandaan* wagera,

Har shirt ki bushratt bana dali hai Anwar,

Yun chaak kiya hum ne garebaan* wagera..

(dandaan;artificial teeth)(garebaan;collars)

Tujhe Mujhse Mujko Tujse Jo Bohat Hi Pyar Hota...

Khawaja Islam February 06, 2014 0

Ghazal's

Tujhe Mujhse Mujko Tujse Jo Bohat Hi Pyar Hota,

Na Tujhe Qaraar Hota Na Mujhe Qaraar Hota,

Tera Har Marz Ulajhta Meri Jaan-e-natwaan Se,

Jo Tujhe Zukaam Hota Tou Mujhe Bukhaar Hota,

Jo Mein Tujko Yad Karta Tujhe Cheenkna Bhi Parta,

Mere Sath Bhi Yakeenan Yehi Bar Bar Hota,

Kisi Chowk Mein Lagate Koi Chooriyon Ka Khokha,

Tere Sheher Mein Bhi Apna Koi Karobaar Hota,

Gham-o-ranj Aashiqana Nahin, Calculator’aana,

Isey Mein Shumaar Karta Jo To Be’shumaar Hota,

Wahan Zer-e-behess Atey Khat-o-haal O Huye-hubaan,

Gham-e-ishq Per Jo Anwar Koi Seminar Hota..!

Mard Honi Chahiye, Khatoon Hona Chahiye...

Khawaja Islam February 06, 2014 0

Ghazal's

Mard Honi Chahiye, Khatoon Hona Chahiye,

Ab Grammer Ka Yehi Kanoon Hona Chahiye,

Nursery Ka Daakhla Bhi Ab Sar’sari Mat Janiye,

Aap Ke Bache Ko Aflaatoon Hona Chahiye,

Raat Ko Bache Parhayi Ki Aziyat Se Bache,

In Ko TV Ka Bohat Mamnoon Hona Chahiye,

Doston English Zaroori Hai Hamare Wastey,

Fail Honey Ko Bhi Koi Mazmoon Hona Chahiye,

Sirf Mehnat Kya Hai Anwar Kamyaabi Ke Liye,

Koi Ooper Se Bhi Telephone Hona Chahiye..

(khatoon;lady)(sar’sari;easy)(mamnoon;thankfull)

Hijar ka naag to pathar ghayal kar deta hai...

Khawaja Islam February 06, 2014 0

Wasi Shah

Hijar ka naag to pathar ghayal kar deta hai,

Sonay jese shakhss ko peetal kar deta hai,

Mere ishq mein shayed koi kami huyi ho,

Tera hussn to ab bhi paagal kar deta hai,

Aesi lazzat kahin nahin milti, shayed woh,

Apna pyaar bhi chaaye mein hall kar deta hai,

Dil mera veeran hua to hasrat kesi,

Hijar ka zeher to daryaa ko thall kar deta hai,

Mujh ziddi ko rab bhi raazi na kar paye,

Lekin teri aankh ka kaajal kar deta hai,

Tere lamss ka jadu bhi kesa jadu hai,

Jiss ko chuu le us ko sandal kar deta hai,

Tera chahra har chehre per chaa jata hai,

Yeh manzar har manzar aujhal kar deta hai,

Aankh ke registaa’n ko teri yaad ka badal,

Chuu jaye to pal mein jal’thall kar deta hai.

Urdu Sad Poetry

Followers

Sponsor

Tags

Extra Ads

Thursday, February 6, 2014

Hijr Ki Pehli Shaam Ke Saaye...

Yeh mojza bhi muhabbat kabhi dikhaye mujhe..

Insha G utho ab kooch karo...

Dil hijr k dard se bojhal hai...

Dil dard ki shiddat se..

Dekh lete ho mohabbat se yehi kaafi hai...

Yeh aur baat teri gali main na ayen hum...

Kahin aah ban ke lab per tera naam aa na jaye...

Ajnabi khauf fizaon main basa ho jaise...

Hai aap ke honton pe jo muskaan wagera...

Tujhe Mujhse Mujko Tujse Jo Bohat Hi Pyar Hota...

Mard Honi Chahiye, Khatoon Hona Chahiye...

Hijar ka naag to pathar ghayal kar deta hai...

Social

Recent

Popular

Comments

Archive

Trending

Tags

Labels

Categories

Contact Form